香港作家網

每年的母親節，除了是天下母親的節日，也是兒女成績單的比武日子。 一班親朋戚友，同坐一張酒樓大枱，口沬橫飛之戰仿如身處赤壁

阿斌端著茶壺 ：「媽媽請飲茶，母親節快樂！」


阿斌從小成續斐然，人又勤奮待人亦親切有禮，素來在這成績單的比武日子一枝獨秀，深得各人的鐘愛。 可是，自從兩年多前阿斌選擇了創業之後，濯足之水已非前水，一切的景象仿佛都已被更替


陳太： 「阿斌而家做生意，可是大老闆呢，斌媽你下半世一定無憂啦」


斌媽媽： 「客氣客氣，年青人想自己出去闖，就比佢地試下…」


張太： 「係呢∼ 阿斌，你而家辦公室係邊度？ 」


阿斌：「我辦公室而家係觀塘區...  」


張太再追問：「哦！ 係唔係創紀之城果度？ 嘩，果度好高好靚喎，又落地玻璃！ 」

陳太： 「唉∼ 阿斌，你將來真係要睇實我個仔國強， 佢打公仔一名，唔學得你咁出色...」


國強： 「係呀∼  斌哥，將來睇住細佬我啦∼ 」
（媽，唔好咁講自己個仔好喎）


阿斌： 「唔係呀，我只係同拍檔租左個幾百尺的工廈單位做辦公室，裡面放幾張枱.... 因為創業才剛起步，咩都要錢，香港創業成本又貴，所以都要咬實牙關」


陳太： 「吓！？ 工廈？ 香港仲有工業咩？  阿斌你又話攪咩野科技野，點解會選擇工業大廈？ 國強雖然打工，但佢係中環個辦公室好大好靚喎，仲有一班下屬比佢指揮~ 雖然係就係打工仔，但總算工作環境好，是中環的上班族，穩穩定定每個月都比到唔錯家用屋企呀」


國強：「媽呀∼ 點同呢，我做金融財務，間公司本身係外國大企業，所以中環間辦公室先咁靚咁大。 阿斌是憑自己雙手努力做生意的，唔可以咁樣比」


張太：「但係做生意門面好緊要喎，你話見客帶人上工廈幾核突？ 新聞都成日話工廈好多時欠缺維修，好危險。唉呀阿斌，你就唔好慳那些小錢啦」


斌媽媽開始覺得有點不對勁，嘗試幫口阿斌： 「Hey~ 中環有咩好，到處食野都貴。 同埋，後生仔創業當然由低慢慢做起，觀塘工廈租金平嘛」


陳太： 「斌媽媽，話晒阿斌都係老闆，又有碩士學歷，係工廈做野又臭又細，有咩好？ 你都唔想見到個仔捱苦吧！？」


阿斌： 「其實都無話咩老闆唔老闆，公司才剛起步，好多野都係自己一手一腳做晒，就算公司打掃清潔都是自己做的」


張太：「唔係啩？ 讀咁多書揸掃把掃地？ 」


張太雖然表演出很驚訝，但心中郤滿是歡喜的。 因為，張太的兒子祥仔是阿斌的同班同學，阿斌往往都是考全級第一，但阿祥則只顧著打波，成續並不見得人，中五會考只有3分便出來社會工作了。 但今天的祥仔在某中學做駐校教練，總算生活安穩，獲別人的尊敬。


阿斌也深明，這樣討論下去，可能會使媽媽很難受，他嘗試打圓場道： 「時間都不早了，我都要趕回公司開會，所以... 」


話還未說完，陳太竟然又來插嘴：「阿斌，識左你媽媽一段時間，先坦白同你講。 你一直都生性乖仔，仲要好叻仔，你是我們當中最讀得書的。但你睇下你媽媽，都辛苦左大半世人，係酒樓洗碗洗左成廿年先養大到你。 你不如認真搵份穩定的工作，等你媽媽享下褔啦... 」


張太：「唉，阿斌都咁大個仔，係外面撞下板就明的了，只係辛苦左阿斌媽媽，仲要唔知捱多幾耐。阿斌，你拿拿聲食埋粒蝦餃，就返公司開會啦∼」


陳太：「趕時間仲食咩蝦餃，國強你食左去」


陳太隨即便將粒蝦餃夾到國強的碗中，這麼多年了，今天在中環西裝骨骨上班的兒子國強總算嬴返一仗



阿斌只好無奈地，拖著沉重的心情準備離開。 離開前，他輕聲的在媽媽耳邊說：「對不起，都是我不好」


斌媽媽輕拍了阿斌的頭一下: 「傻仔來的，媽媽永遠都是你的媽媽，有什麼好對不起。 我其實以你為驕傲，香港肯去追求理想的年青人不多，而我的兒子很榮幸是其中一個。」


斌媽媽這番話，盡顯為人母親的榜樣。 創業不容易，作為創業者的母親更不容易，謝謝妳。